الأوسمة 2 عدد المساهمات : 1000 تاريخ التسجيل : 15/01/2011
موضوع: انا انسان مع نفسي قبل لا اكون معك انسان الثلاثاء نوفمبر 22, 2011 4:36 pm
هالموضوع فكرت اكتبه بعد كذا موقف حصل لي .. إستفدت منهم كثير وحبيت افيد غيري ..
بدايةً احب اقول مافي احد منا متصافي مع الكل .. حتى وان قلنا اننا مو زعلانين على احد لابد تبقى في جواتنا حاجه مضايقتنا من شخص او شايلين عليه .. يمكن على شي يسوى ويمكن يكون شي جدآ سخيف ..
اللي بقوله عن نفسي ويمكن تشوفون انفسكم فيه .. قبل فتره كنت متضايقه من وحده وشايله بخاطري عليها على انها ماتدري ولا فكرت ابين لها خصوصآ انها قريبه لي مره بس من دخل رمضان وانا افكر فيها .. مع انها كبيره بالعمر وام عيال يعني مافي شي يخليني افكر فيها كذا ! وغصب عني ضميري يأنبني .. لما اتخيل لو جاء يومها .. وانا ماحللتها وش بيكون موقفي لحظتها ! ما اتخيل اني بأسامح نفسي = (
قررت اني أسامحها وأحللها هي و كل من أخطأ بحقي .. بعلم منه او بغير علمْ .. لإني صرت احاسب نفسي بعقل .. فيه تصرفات تصدر مننا نحسها شي عادي لإننا ندري وش نيتنا لكن لما تصير من غيرنا حتى لو نفس التصرفات بناخذ على خواطرنا وبنقول ان ورا هالكلام شي ثاني صرت قبل لا أحكم على احد احط نفسي مكانه ..
وأتذكر في قصه على ايام الرسول صلى الله عليه وسلم ناسيه احداثها بالضبط بس فيها خُلق عظيم ياليتنا نتعلم منه " كان فيه رجل قيل انه بيدخل الجنه بدون حساب .. استغربوا الصحابه لإن صلاتهم اكثر من صلاته وصحبتهم للرسول اقوى من صحبته يعني مافيه شي زود عنهم , طبعآ بنظرهم وكان السبب انه في كل ليله قبل لاينام يطهر قلبه من اي حقد او غضب على اي شخص يعرفه "
بعدها احس اني تغيرت للأفضل .. واشياء كثيره تغيرت نظرتي لها , لإن سبحان الله التسامح و صفاء النيه كلها تهدّي البال , وتسعد القلب .. شي مدري شلون اوصفه لكُم .. ودي الكل يجرب اللي حسيت فيه .. لإن وقتها بتحسون قد ايش كنتوا سخيفين انكم ضيقتوا خواطركم على اشياء بايخه .. خاصه بين البنات هالشي بزياده عندنا و بعض البنات الله يهديهم وانا منهم نتهاون بمسألة الظنون .. ياكثر ما نظن في ناس مالهم دخل .. مع ان الظن السيء شي مو بسيط , وماننسى قوله سبحانه : k]ياأيها الذين آمنوا أجتنبوا كثيرا من الظن ان بعض الظن أثم ]
الظن مو بس اثم .. الظن اشوفه ظلم لإن الواحد مايظن الا لشيء مو متأكد منه
صفات ودي نتركها مره وحده وادري صعبه بالبدايه .. بس لازم لازم نتغير وفرصه هالأيام المباركه الواحد يبدأ فيها بدايه صالحه .. الغيبه - الشماته <- وهذي اكثر شي مدهورتنا ..
ياكثر اللي يتشمت وهو مايحس بنفسه ..
دائمآ اقول ياربي انا ماتشمت بفلانه ليش انا صرت زيها !! بس السبب احيانا بيني وبين نفسي اصير ناقده عليها او استنكر تصرفها .. مع ان المفروض اعذر اللي قدامي مهما كان اللي يسويه حتى لو كان اكبر غلط .. يعني لما تشوف شخص جدآآآ بارد او عصبي او ثقيل دم او او او الخ يعني تصرفات ماتعجبك عند اللي قدامك بس ماتكون فيك .. لاتنتقد حتى لو بنفسك بس قول هالدعوه مره حلوه وتُقال بهالمواقف لإنها تكفيك اللي شفته طول العمر .. d]الحمدالله الذي عافاني من ماإبتلاك وفضلني على كثيرآ من خلقه تفضيلآ كثيرآ ] وفي كثير يقول انا ما أتشمت بس اقول اني استغربت هالتصرف او قاعد اسولف عادي صدقوني كل كلمه محاسبين عليها .. غمضوا عيونكم عن اي شي مايعجبكم .. شوفوا الاشياء الحلوه بس ..
اصلا لو نلاحظ ان الاشخاص اللي نحب نتقرب لهم ونكسب ودهم هم الاشخاص اللي نادر ينتقدون واذا انتقدوا ينتقدون بإسلوب مؤدب بعيد كل البعد عن جرح المشاعر .. حتى الاشخاص اللي دايمآ يمدحون بإسلوب حلو بدون مبالغه .. نحس بفرح بعد مانشوفهم او بعد مانكلمهم .. لإن مهما كان الانسان يحب تكون محاسنه واضحه ويحب ان الناس تهمّش عيوبه ..
وللأسف في ناس من كثر ماينتقدون ولا في اي شي يعجبهم ما احب اسمع لإنتقادهم حتى لو كان على حق بعكس اللي دايمآ معجب فيك ويمدح ويرفع بك لو انتقدك مره راح تحس انه صادق وما انتقد من عبث لإن هالشي مو من عادته وفي طريقه حلوه للي يعانون من هالأشخاص .. لما ينتقد إتبعوا نظام التسليك يعني انو كلامك صح و100% مافي احد مثلك فاهم وعلى قد ماينتقد على قد ماتمدحه .. في شي غصب عنه راح يحرجه .. ويبطل شوي شوي هالعاده لإن الواحد لو حب يغير اي طبع فيه .. مو بس لحاله يقدر على كذا لازم اللي حوله يساعدونه ..
حتى الغيبه لازم نعاون بعض على تركها .. اعرف ان مافي جلسه مايخلو منها الحش بس لازم نبدأ من انفسنا لاتتكلمون في أحد حتى لو من باب الميانه .. محد فينا يرضى ان غيرنا يتكلم عن اي شي يخصنا بغيابنا لما يصير في احد قبالك يتكلم .. لاتشجعه قول مايستاهل ياخذ من حسناتك ولا انت ناقص تاخذ ذنوب احد .. بكذا انت اخذت اجرك واجره ..
طيب بدينا بأنفسنا بعدين باللي حولنا مو الأولى ان اطفالنا نعودهم على هالشي ..؟!
يعني شفت بعيني ام وعندها بنتها بعمر ال12 سنه تُعتبر طفله لما تروح البنت لحالها لأي مناسبه لــ.. نفترض من عند عمانها تجي تفتح معها تحقيق وش قدموا ..؟ وش جابوا ..؟ وش لبسوا ..! ووووالخ !! بالله عليكم البنت هذي اللي تشوف الام قدوتها لما تسمع منها هالحكي وش تتوقعون موقفها بعدين .؟ بتحس ان هالتحقيق مجرد سوالف وتستسهل هالاشياء يمكن تقولون اسئله عاديه وكلنا نسألها .. طيب انا معكم في هذي بس ماراح نتطرق لمسألة الذوق ..؟ ماراح نجيب طاري المقارنه بين فلانه وعلانه ! وكل هالأشياء البسيطه تتسلسل الى الغيبه ..
ياليييييييييت ياليت من قلب اقولها اطفالنا قد مانقدر نحث فيهم المباديء اللي نفتقدها او ما تأسسنا عليها .. الحمدالله الخير بقلوبنا للحين, وللحين الناس تحرص على تغيير نفسها للأفضل .. بس ولو .. مطلوب منا شي ملموس .. الحكي محد اشطر مننا فيه .. لكن وين التطبيق !
ملهم جرجنازي
عدد المساهمات : 130 تاريخ التسجيل : 16/01/2011
موضوع: رد: انا انسان مع نفسي قبل لا اكون معك انسان الإثنين نوفمبر 28, 2011 3:43 pm
موضوع: انا انسان مع نفسي قبل لا اكون معك انسان 
الثلاثاء نوفمبر 22, 2011 4:36 pm
